जामखेड महावितरणचा डिजिटल उपक्रम – ‘व्हॉट्सअ‍ॅप ग्रुप’द्वारे लाईट संदर्भातील माहिती मिळतेय घरबसल्या!

लोकतंत्र न्यूज नेटवर्क –

जामखेड शहरातील महावितरण कार्यालयाने नागरिकांच्या सोयीसाठी एक अभिनव आणि डिजिटल पाऊल उचलले आहे. नागरिकांच्या तक्रारी लक्षात घेऊन ‘महावितरण जामखेड शहर’ या नावाने अधिकृत व्हॉट्सअ‍ॅप ग्रुप सुरू करण्यात आला आहे, ज्याच्या माध्यमातून शहरातील लाईट संबंधित सर्व माहिती थेट नागरिकांच्या मोबाईलवर पोहोचवली जात आहे. जामखेड महावितरण चे सहाय्यक अभियंता श्री प्रशांत शिंदे यांच्या संकल्पनेतून व उपकार्यकारी अभियंता कटकधोंड साहेब यांच्या मार्गदर्शनाने हा ग्रुप तयार करण्यात आला असून सर्व ऑपरेटर्स तसेच वीज ग्राहक यांना एकाच वेळी सदर माहिती मिळत असल्याने वीज वितरण चा कारभार हा सुरळीत झाला आहे.

⚡ लाईट गेले की आता तांत्रिक कारणांची माहिती मिळते थेट मोबाईलवर!

पूर्वी लाईट गेल्यानंतर नागरिक संभ्रमात राहत असत. लाईन फॉल्ट आहे का, ट्रान्सफॉर्मर बिघडला आहे का, देखभाल काम चालू आहे का याची कोणतीही खात्रीशीर माहिती मिळत नसे. अनेकदा नागरिकांनी वारंवार कार्यालयात फोन करण्याचा प्रयत्न केला, पण कॉल जाऊ न शकल्याने अस्वस्थता वाढत होती.

याच पार्श्वभूमीवर महावितरणने नागरिकांशी थेट संवाद साधण्यासाठी डिजिटल पद्धतीचा अवलंब केला आहे.

📲 ‘महावितरण जामखेड शहर’ व्हॉट्सअ‍ॅप ग्रुप द्वारे कळतात या गोष्टी?

लाईट गेल्याचे कारण (उदा. लाईन फॉल्ट, ट्रान्सफॉर्मर बिघाड)

लाईट कधीपर्यंत येईल याचा अंदाज

नियोजित देखभाल व विद्युत बंदीची पूर्वसूचना

तातडीच्या दुरुस्ती कामांची माहिती

नागरिकांसाठी सतर्कता व सुरक्षिततेचे संदेश

हा ग्रुप Broadcast (एकतर्फी माहिती) स्वरूपात असणार असून फक्त अधिकृत महावितरण कर्मचारीच माहिती पोस्ट करत असल्याने अधिकृत अशीच माहिती मिळत आहॆ.

👥 नागरिकांचा सकारात्मक प्रतिसाद

या उपक्रमास नागरिकांचा भरभरून प्रतिसाद मिळत असून, आता लाईट संदर्भातील तांत्रिक माहिती घरबसल्या मोबाईलवर मिळत असल्याने नागरिकांची चिंता कमी झाली आहे.

विशेषतः व्यापारी वर्ग, विद्यार्थी, महिला आणि ज्येष्ठ नागरिक यांच्यासाठी ही सेवा अत्यंत उपयुक्त ठरत आहे.

स्थानिक वीज ग्राहक, सामाजिक कार्यकर्ते आणि व्यापारी संघटनांनी महावितरणच्या या डिजिटल निर्णयाचे स्वागत केले असून, पारदर्शक व तत्पर सेवा ही गरज ओळखून उचललेले हे पाऊल उल्लेखनीय असल्याचे मत व्यक्त केले आहे.

📌 महावितरणचे आवाहन:

 “नागरिकांनी या ग्रुपमध्ये सहभागी होण्यासाठी आपापल्या भागातील ऑपरेटर सी संपर्क साधावा की जेणेकरून सदर सेवेची माहिती आपणापर्यंत वेळेवर पोहोचवेल  ही सुविधा सुरू करण्यामागे कार्यालयात कॉल्सचा भार कमी करणे व, नागरिकांना अचूक व वेळेवर अपडेट्स मिळावेत, हाच आमचा हेतू आहे.”